Ekintzailetza
Jarri martxan!

Busturialdeko IX. Enpresa Ideia Lehiaketa

Negozio-ideiak aurkezteko epea 2022ko azaroaren 18an bukatuko da, 14:00etan

Bermeoko eta Gernika-Lumoko udaletako gazteria zerbitzuek eta Ajangiz, Arratzu, Bermeo, Busturia, Elantxobe, Ereño, Errigoiti, Foru, Gautegiz Arteaga, Gernika-Lumo, Kortezubi, Mendata, Morga, Mundaka, Murueta, Muxika, Nabarniz eta Sukarrieta biltzen dituen Urremendi Landa Garapen Elkarteak, Bizkaiko Foru Aldundiarekin batera, Busturialdeko IX. Enpresa Ideia Lehiaketa abian jarri dute, bederatzigarren urtez jarraian. Lehiaketak enplegua sortu eta Busturialdeko gazteen ekintzailetza kultura sustatzea du helburu. Aurreko zortzi edizioak kontuan hartuta, guztira 150 enpresa ideia eta enpresa aurkeztu dira.

Eskualdeko gazteak lan mundura sartzea ahalbidetzen duen ‘Lana bilatzea, Lana’ da programa Bizkaiko Foru Aldundiaren Gaztedi Busturialdea proiektuan kokatuta dago eta lehiaketaren edizio berri honek beren ideia berritzaileak abiatzeko eta enpresa ikuspegia saritzeko aukera eskaintzen die Busturialdeko gazteei.

Busturialdeko IX. Enpresa Ideia lehiaketaren helburuak, besteak beste, Busturialdean kultura ekintzailea sustatzea, komertzialki bideragarriak diren zerbitzu eta produktuak garatze aldera; eskualdean enplegua eta aberastasuna sortzea eta Busturialdeko ekonomiaren garapena bultzatzea eta sustatzea dira.

Aurreko urteetan bezala, lehiaketan 18 eta 35 urte bitarteko gazteek edo gazte-taldeek parte hartu ahal dute, betiere, aurkeztutako enpresa ideia Busturialdean kokatzen bada. Zerbitzu edo produktu bat sortzeko ideiak edota 2022. urtean sortutako negozioak/enpresak izan daitezke, baina derrigorrez Busturialdean egon beharko dira, eta sustatzaileak/ek arestian adierazitako adin-betekizuna bete beharko du(te).

Epaimahaiak jarraian adierazitako irizpideak baloratuko ditu aurkeztutako proiektuetan:

  1. Ideiaren originaltasuna eta berrikuntza maila: balio erantsia edukitzea edota originala izatea.
  2. Talde edo norbanako ekintzaileak proiektua garatzeko dituen gaitasunak.
  3. Enplegua sortzeko aukera eta horien kalitatea.
  4. Negozioaren potentziala, garapen maila eta Busturialdean gauzatzeko bideragarritasun teknikoa eta ekonomiko-finantzarioa.
  5. Eskura dauden baliabideen aprobetxamendua, jasangarritasuna eta proiektuaren gizarte-erantzukizuna.
  6. Gizarte-eragina.

Lehiaketan parte hartu nahi dutenek datorren azaroaren 18ko 14:00ak arteko epea dute beren proposamenak aurkezteko. Sari-banaketa abenduan izango da.

Irabazleak 3.000 euroko saria jasoko du, bigarrenak 2.000 eurokoa eta lehen sektoreari lotutako ideiarik onenak, aldiz, 1.000 euro jasoko ditu, aurreko sarietako baten bat jaso ez badu. Gainera, lehenengo eta bigarren sarituei, urtebetez doako usufruktuan lan egiteko lanpostu bat utziko zaie Arratzu Elkartegia Langunean. Era berean,  Torrealday Aholkularitzak doan emango dio irabazleari urtebeteko iraupena izango duen aholkularitza-zerbitzua (fiskala, lanekoa eta kontabilitatekoa), eta bigarrenari, ordea, sei hilabetekoa.

Aurten, gainera, hiru sari horietatik aparte, Teknologia-arloko Start Up bat sortzeko edo garatzeko enpresa-ideia onena ere sarituko da. Horrek 1.000 euroko saria eramango du, betiere aurreko sarietako baten bat jaso ez badu.

Epaimahaiaren iritziz ideiek ez badute gutxieneko kalitate eta originaltasun mailarik, sariak (bat, batzuk edo guztiak) eman gabe gera daitezke.

Teknologia-arloko Start Up bat sortzeko edo garatzeko enpresa-ideia onena ere sarituko da aurten

Izen-emate orriak Bermeoko eta Gernika-Lumoko Udaletako Gazte Informazio Zerbitzuetan edo Urremendi Landa Garapen Elkarteko bulegoan jaso ahal dira. Gainera, web-orri honen bitartez ere deskargatu ahal dira, albiste honen bukaeran. Izen-emate orri horiek eta beharrezko dokumentazio guztia paperean aurkeztu beharko dira, 2022ko azaroaren 18ko 14:00ak baino lehenago.

2021eko ideia irabazleak

Joan zen urtean, Urgain izeneko ideiak eraman zuen lehen saria, segurtasun eta berrikuntza zerbitzuen sektorera bideratutakoa, droneak erabiliz. Borja Txertudi (Busturia, 1993) eta Ander Etxaniz (Busturia, 1992) izan ziren ideiaren sustatzaileak.

Bigarren saria Melodeep izeneko enpresa ideiarentzat izan zen. “Melodeep marka musika elektronikoaren zatirik ederrena erakusteko sortu zen, pintura, ikus-entzunezko ekoizpenak, dantza edo inspirazio iturri izan daitekeen beste edozein arte adierazpenekin nahastuta“, adierazi du Paul Larrozea (Bermeo, 1992) bermeotar gazteak, ideiaren sustatzaileak.

Bi sari horiez gain, Turismo Jasangarriaren Europako Gutunaren esparruan, iraunkortasunaren ikuspegitik turismoaren garapena sustatzera bideratutako enpresa-ideiarik onena ere saritu zen. Aser Cid Foruria gaztearen (Gernika-Lumo, 1999) Harri Artean Abentura Parkea izan zen ideia irabazlea.

 

Oinarriak

Lehiaketaren oinarriak eta izen-emate orriak

Argazki galeria
Bideoa
Non aurkitu gure bulegoak?