Urriaren 15etik 2019ko urtarrilaren 10era arte, Zeinu Hizkuntza ikastaro barria emango da Bermeon, “Lana bilatzea, Lana da” programaren barne. Izena emateko epea urriaren 8ra arte dago zabalik. Ikastaroan apuntatzeko, derrigorrezkoa da beheko formularioa betetzea eta bidaltzea.
Pertsona Gorren Elkarteen Euskal Federazioak emango du ikastaroa. Helburua da gorrak diren eta ez diren pertsonen arteko komunikazioa erraztea eta komunikazio hori eragozten duten oztopoak apurtzea, elkarren arteko harremanak aberasteko.
Ikastaroak 140 orduko iraupena izango du (120 ordu + 20 ordu ez presentzial), Eusko Jaurlaritzak homologatuta dago eta 15 ikaslek hartu ahal izango dute parte, gehienez. Ikastaroaren edukia izango da aurkezpenak egiten ikastea eta agurrak edo zeinu-hizkuntzaren alfabeto daktilologikoa ikastea, besteak beste.
Ikastaroa gainditzen dutenek Eusko Jaurlaritzak homologatutako titulu ofiziala jasoko dute
Plaza kopurua mugatua denez, eskainitako plaza kopurua interesdunen kopurua baino txikiagoa bada hautaketa egingo da eskabidea egin dutenen artean. Ohi bezala, Gaztedi Busturialdea programan parte hartzen duten herrietan erroldatutako 18 eta 35 urte bitarteko gazteek lehentasuna izango dute.
Arratzu, Bermeo, Ereño, Forua, Gautegiz Arteaga, Gernika-Lumo, Kortezubi, Mendata, Morga, Mundaka eta Sukarrietan erroldatutakoek 250 euroko matrikula ordaindu beharko dute. Hala ere, ikastaroa bukatu ondoren %90etik gorako parte-hartzea izan dutenei 100 euro itzuliko zaizkie.
Gainerako herrietan erroldatutakoek, berriz, 289 euro ordaindu beharko dituzte.
Formakuntza honen bidez, Busturialdeko gazteak gaitu nahi dira lana bilatzeko prozesuan arrakasta izan dezaten.
Ikastaroa Arratzu, Bermeo, Ereño, Forua, Gautegiz Arteaga, Gernika-Lumo, Kortezubi, Mendata, Morga, Mundaka eta Sukarrietako Udaletako Gazteria Zerbitzuek eta Bizkaiko Foru Aldundiak antolatu dute Gaztedi Busturialdea proiektuaren barne.
Consulta aquí la normativa que deberán cumplir los alumnos admitidos.
